Luk 14 | PltULB | STEP | Ary indray Sabata, rehefa nankao amin’ny tranon’ny iray tamin’ireo mpitarika ny fariseo hihinana mofo Izy dia nanara-maso Azy akaiky izy ireo.

Luke 14

1 Ary indray Sabata, rehefa nankao amin’ny tranon’ny iray tamin’ireo mpitarika ny fariseo hihinana mofo Izy dia nanara-maso Azy akaiky izy ireo. 2 Indro, teo anoloany nisy lehilahy iray izay nampijalian’ny edema. 3 Jesosy nanontany ireo manam-pahaizana amin’ny lalàn’ny Jiosy sy ireo Fariseo hoe: ‘’Azo atao ve ny manasitrana amin’ny andro Sabata, sa tsia?‘’

4 Fa izy ireo dia nangina. Noho izany dia noraisin’i Jesosy izy, ary nositraniny, dia nalefany handeha. 5 Hoy izy tamin’izy ireo hoe: ‘’Iza aminareo izay manan-janaka lahy na omby tafalatsaka anaty fatsakana amin’ny andro Sabata no tsy hisintona azy avy hatrany?‘’ 6 Izy ireo dia tsy nisy nahavita nanome valiny an’ireo zavatra ireo.

7 Rehefa tsikaritr’i Jesosy ny fomba fisafidianan’ireo izay nasaina ny toeram-boninahitra, nanao fanoharana izy, niteny tamin’izy ireo hoe: 8 ‘’Rehefa asaina amin’ny lanonam-panambadiana ianareo, aza mipetraka eo amin’ny toeram-boninahitra, satria mety nisy olona nasaina mbola manam-boninahitra noho ianareo. 9 Rehefa tonga ilay olona izay nanasa anareo, dia hiteny anareo izy hoe: ‘Omeo an’ity olon-kafa ity ny toeranao,’ ary am-pahamenarana no andehananareo hamonjy ny toerana ambany indrindra.

10 Fa rehefa asaina ianareo, mandehana dia mipetraha amin’ny toerana ambany indrindra, amin’izay rehefa mandalo eo ilay nanasa anao, dia mety hiteny anao izy hoe: ‘Ry namana, miakara amin’ny ambonimbony.’ Ary avy eo dia homem-boninahitra ianareo eo anatrehan’ireo izay rehetra miray latabatra aminareo. 11 Fa ireo izay manandra-tena dia hahetry, ary izy izay manetri-tena dia hasandratra.‘’

12 Jesosy ihany koa dia niteny tamin’ilay lehilahy nanasa Azy hoe: ‘’Rehefa manome sakafo na fanasana ianao, dia aza manasa ireo namanao na ireo rahalahinao na ireo akaiky anao na ireo mpanakarena manodidina anao, amin’ny mety hanasany anao koa ho takalon’izany, ary dia ho voavaly ianao.

13 Fa rehefa manao fanasana ianao, asao ny mahantra, ny kilemaina, ny mandringa, ary ny jamba, 14 dia ho sambatra ianao, satria tsy afaka hamaly anao izy ireo. Fa ianao dia ho voavaly amin’ny fitsanganan’ny marina.‘’

15 Rehefa naheno ireo zavatra ireo ny iray tamin’ireo niray latabatra tamin’i Jesosy, dia niteny taminy izy hoe: ‘’Sambatra izay hihinana ny mofo ao amin’ny fanjakan‘Andriamanitra!‘’ 16 Fa Jesosy niteny taminy hoe: ‘’Nisy lehilahy iray nikarakara sakafo lehibe ary nanasa olona maro. 17 Rehefa voakarakara ny sakafo, dia naniraka ny mpanompony izy hiteny an’ireo izay nasaina hoe: ‘Mandrosoa, fa ny zava-drehetra dia efa vonona.’

18 Izy rehetra dia nitovy saina ary nanomboka nanao fialan-tsiny. Ilay voalohany niteny taminy hoe: ‘Nividy saha aho, ka tokony hivoaka aho ary ijery izany. Miala tsiny aho.’ 19 Iray hafa niteny hoe: ‘Nividy omby folo aho, ary andeha hamantatra azy ireo. Miala tsiny aho.’ 20 Avy eo nisy lehilahy iray hafa niteny hoe: ‘’Vao avy nampiaka-bady aho, ary noho izany dia tsy afaka ny ho avy aho.’

21 Dia tonga ilay mpanompo ary niteny tamin’ny tompony ireo zavatra ireo. Avy eo ilay tompon-trano tezitra ka niteny tamin’ilay mpanompony hoe: ‘’Mandehana faingana eny amin’ireo lalambe sy sakeli-dalana eto an-tanàna dia ento aty ny mahantra, ny mandringa, ny jamba, ary ny kilemaina.’ 22 Niteny ilay mpanompo hoe: ‘’Tompo, efa vita izay nobaikonao, fa mbola misy toerana ihany.’

23 Hoy ity tompony tamin’ilay mpanompony hoe: ‘’Mandehana eny amin’ireo lalambe sy sisim-boly ary tereo izy ireo ho avy, amin’izay ho feno ny tranoko. 24 Fa lazaiko aminareo, tsy hisy hanandrana ny sakafoko ireo lehilahy izay nasaina.‘‘’

25 Ary vahoaka maro no nandeha niaraka taminy, ary nitodika Izy ary niteny azy ireo hoe: 26 ‘’Raha misy aminareo manatona Ahy ary tsy mankahala ny rainy, ny reniny, ny vadiny, ny zanany, ireo rahalahiny sy ireo rahavaviny, ary na ny fiainany aza, dia tsy afaka ny ho mpianatro izy. 27 Na iza na iza tsy milanja ny hazofijaliany ary manaraka Ahy dia tsy afaka ny ho mpianatro.

28 Fa iza aminareo, izay maniry ny hanangana tilikambo, no tsy mipetraka aloha ary mikajy ny fandaniana raha manana izay ilaina hamitana azy izy? 29 Raha tsy izany, rehefa nametraka ny fototra izy nefa tsy hahavita izany akory, dia hanomboka handatsa azy ireo rehetra izay mahita izany, 30 manao hoe: ‘Io lehilahy io no nanomboka nanangana kanefa tsy nahavita akory.’

31 Na koa mpanjaka inona, raha handeha hifanehitra amin’ny mpanjaka hafa amin’ny ady, no tsy hipetraka aloha ary haka hevitra raha miaraka amin’ny lehilahy iray alina dia afaka hiady amin’ny mpanjaka hafa izay tonga manohitra azy miaraka amin’ny lehilahy roa alina? 32 Raha tsy izany, raha mbola lavitra ny tafika hafa, dia mandefa antoko izy ary mangataka fepetra ho amin’ny fihavanana. 33 Ka noho izany, na iza na iza aminareo tsy mahafoy izay rehetra hananany dia tsy afaka ny ho mpianatro izy.

34 Tsara ny sira, fa raha very ny tsiron’ilay sira, ahoana no hiverenany hasira indray? Tsy misy ilan’ny tany azy na dia ny zezi-tany aza. Ariana fotsiny izany. Izay manan-tsofina ho enti-mihaino, aoka izy hiaino.‘’